Kawlgam democracy nga ding vai le Zo te’n athahat kipawl na kip khat inei ding uh akisap vai, tu ma kum 2007 lai pawl pan aa ikikup uh thu tun kikum kia vai. Tom gen pien len vai, atawp sa in zong ikikup ngai sa uh thu hi. Ikipawl na a thahat thei nading in, sum kisam masa hilo in, imite ikipawl na aa sum tawh ang kihal thei nading in, athu ala, kivai puoh zie, ikilam zie kisam masa hizaw ding in ka um hi.
Zo milip 100% ah 100% ici zo nai sih zong in, 75% cieng te’n, tam ikipawl na ah sep ton na inei thei ding uh kisam masa hizaw aa, tua hipo leh tua teng tung pan sum te ang om ding ahi hi. Tua zieh in,
Khat na-ah, bang ci leih, imite'n ahuom kipawl ton na khat inei zo ding vuoi?
Ni na-ah, Mimal ei kikhen thang sah thei kipawl na atampi nei ding kisam masa lo ci thu leh,
Thum na-ah, si suo anei lo kipawl na tampi khat inei ngeng ngong siang in, iveh pi kigawm ton le sep ton thei na kipawl na kicien mama khat inei ding uh dei huoi masa hi ci thu iphawh siem masah ding uh lung gul huoi masa ding in ka um hi.
Tam thu iphawh siem tahpi uh cieng, tu aa inei uh kipawl na te sung pan, hei mi puo hoi lei ahoi diei? Ci ngaih sut na ang pieng in, tua pan, hoi isah pen uh puopha to in, tua kipawl na sung ah,
1). Akibang lo pawlpi Gentena: Zo AG, Zo Tuiphum, Zo Synod, Zo Catholic ci te sung pan, tanmi sawl ciet in,
2). Pawlpi ciet pan tangmi isawl te sugn ah, inua sie thei tuon lo ahi, be le phung akihal kim thei thei ding in bi kawm in sawl in,
3). Thu gui lhun (Roadmap/Constitution &bylaw) kicien tah nei in etc dan tawh, 75% ahuom zo tey tey ding in, puopha in hileih, puzo news te gen tham thada, kawlpi khuopi mama ah, center khat nei in, Zo suon tate khanto thei nading, INGO te kisam masa nai lo, Zo te sung pan ang luong khie sum le pai ma ma tawh isep zo lo nading athu mama om lo ding in ka um hi.
Lawm te khat inh “ bang ci leih imi sung ah kipum khat na inei thei diei? ci’n ei dong aa, “ nang le kei lien lien makai ding cing in hi na nei lo pi tawh makai ding samul tu aa itu tah cieng, imite akhen thang bep makai isuoh aa, tua zieh in, nuazui hoi khat isuo zawh nading in, han ciem tuoh leih, imi te kikhen thng sah virus lungno 2 akiem suoh pai ding hi” ci’n kadawng hi.
Tam bang kipawlton thei nading ilung gul tahpi uh leh, Neh thei dawn thei lah hilo, zua thei lah hilo, si cieng aa ken thei zong lah hi bek lo, founder po le akisam masa lo, ei thanem sah thei ding, min daw nuom tadi etc po tawh buoi masa lo in, akisap zui in, “kei nuazui din mun ah ang om vang ei” etc kinit diem diem le kingiem khiet tah aa, ikipawl na tha hat thei nading ahi leh, tuolpuong aa to ngam vawt lungsiim tawh iki pat ding uh kisam ding in ka um hi.
Nget na: Gim tama ma sam va uh cin, kaba khata ang ci nai sih un len, adieh dieh in kawlgam sung aa om zatah makai teng aw, ang kipan vawi unh, kibah lo na te nua lam ah koi in, kibah na teng gawm in imungtup pi uh itang tun zawh nading un kipan uh leih, I nukhia nai sih ding uhi ci’n ikingen uhi. Kawlpi khuo ah ang kimu tuo un len hilo uh cin tua sabuoi pan Pasien gamle Zo te khanto thei nading lai mai tha khat tey tey ihong zo ngel ngel ding uh hi. Igam democracy lampi tung ah apei hita hi. Ei te zong I democracy siem thei ding kisam pai hi.
Note: Kipawl na aphut ma sa te mawsah hilo in, puophat ding hoi ci thu agen ihi zaw uh aa, khat lam pan, Individual dan tawh itawn uh leh tua tawh kituoh za cieng ma itung ding uhi.